ಕಣ್ವಪುರದ ಕೃಷ್ಣನನ್ನು
ಭಕ್ತಿಯಿಂದ ಪೂಜೆಗೈದು
ಕಣ್ಣಿನೊಳಗೆ ರೂಪವನ್ನು
ತುಂಬಿಕೊಳ್ಳಿರೊ || ೧ ||
ಪುಣ್ಯಮೂರ್ತಿ ದೇವರನ್ನು
ಶುದ್ಧಮನದಿ ನೋಡಿ ನೀವು
ಧನ್ಯರಾಗಿ ಅಂತರಂಗ
ತೊಳೆಯೆ ಬನ್ನಿರೊ || ೨ ||
ತ್ರೇತಯುಗದ ಅಂತ್ಯದಲ್ಲಿ
ರಾಮದೇವ ಕಣ್ವಮುನಿಗೆ
ಅರ್ತಿಯಿಂದ ಕೊಟ್ಟನಂದು
ಕೃಷ್ಣಮೂರ್ತಿಯ || ೩ ||
ಪುಟ್ಟ ಕೃಷ್ಣ ತೃಪ್ತನಾಗಿ
ಮಕ್ಕಳನ್ನು ಲಲ್ಲೆಗೈದು
ಕೊಟ್ಟ ಪೂಜೆ ಸೇವೆಯನ್ನು
ಪಡೆದು ಕೊಳುವನು || ೪ ||
ಕಣ್ವಪುರವು ಮಹಿಮೆಯುಳ್ಳ
ನಮ್ಮ ಊರ ಪುಣ್ಯಭೂಮಿ
ಬನ್ನಿ ನೀವು ಭಕುತಜನರೆ
ಕೃಷ್ಣನೂರಿಗೆ || ೫ ||
ಭೂಮಿ ನಾಕ ಕಣ್ವಪುರದಿ
ಕಡಲ ತೀರ ನದಿಯ ದಡದಿ
ಕಾಮಿತಾರ್ಥ ಸಲಿಪ ದೇವ
ನಮ್ಮ ಪೊರೆವನು || ೬ ||
ಅಗವನೆತ್ತಿ ಗೋವಕಾಯ್ದ
ಬಾಲಕೃಷ್ಣ ನಮ್ಮ ನೋಡಿ
ಮುಗುಳು ನಗುತ ಕೈಯನೆತ್ತಿ
ಅಭಯ ಕೊಡುವನು || ೭ ||
ತೊಟ್ಳು ಪೂಜೆ ಹರಕೆಹೊತ್ತು
ಕೈಯ ಮುಗಿದು ಸುತ್ತುಬಂದು
ಪುಟ್ಟಮಗುವ ಹೆತ್ತು ಸಲಹಿ
ಧನ್ಯರಾಗಿರಿ || ೮ ||
ಮಕರಮಾಸ ಸಂಕ್ರಮಣಕೆ
ತಲಪಿ ನೀವು ಸನ್ನಿಧಾನ
ವಿಕಲಮನಸು ಹೃದಯ ಬುದ್ಧಿ
ಶುದ್ಧಗೊಳಿಸಿರಿ || ೯ ||
ದೇವರೊಲಿದು ನಿಮ್ಮ ಹರಸೆ
ನಿತ್ಯ ಭಜನೆ ಪೂಜೆಮಾಡಿ
ಕಾವಕಾರ್ಯ ಮಾಡಿರೆಂದು
ಅವನ ಬೇಡಿರಿ || ೧೦ ||
ಛಂದಸ್ಸು:- ೩+೩+೩+೩
೩+೩+೩+೩
೩+೩+೩+೩
೩+೩+೪ ----- ಈ ರೀತಿಯ ಮಾತ್ರಾಗಣವುಳ್ಳ ಛಂದೋಬದ್ಧ ಭಕ್ತಿಗೀತೆ.
ಕಣ್ವಪುರ ಕೃಷ್ಣ (ಭಕ್ತಿಗೀತೆ)
ರಚನೆ:- ವಿ.ಬಿ.ಕುಳಮರ್ವ , ಕುಂಬ್ಳೆ
ರಾಗಸಂಯೋಜನೆ ಮಾಡಿ ಹಾಡಿದವರು :- ಶ್ರೀ ಬಾಲಕೃಷ್ಣ ಆಚಾರ್ಯ ಪುತ್ತಿಗೆ
(ಉಪಯುಕ್ತ ನ್ಯೂಸ್)
Visit: Upayuktha Directory- You get here You want
‘ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
إرسال تعليق