(ಛಂದೋಬದ್ಧ ಆಶು ಮುಕ್ತಕ ಪಂಚಕ)
ಹೆಮ್ಮೆಯಲಿ ಆಳುವರು ಕರುನಾಡ ರಾಜ್ಯವನು
ಹಮ್ಮಿನಲಿ ದಮನಿಸುತ ಗಡಿನಾಡ ಜನರ |
ನಮ್ಮ ಕಾಸರಗೋಡ ಕನ್ನಡದ ಬಂಧುಗಳ
ಸುಮ್ಮನೇ ಕೆಣಕುತಲಿ - ಪುಟ್ಟಕಂದ || ೧ ||
ತಾಯಿ ಭುವನೇಶ್ವರಿಯು ಮೆಚ್ಚುವಳೆ ಇವರನ್ನು
ಸಾಯಲೆಡೆಗೊಡದೆಮ್ಮನಾದರಿಪ ಮಾತೆ |
ದಾಯವಾದಿಗಳಿವರು ನಮ್ಮ ಕನ್ನಡ ಜನಕೆ
ನಾಯಕರು ಖಳರಾಗಿ - ಪುಟ್ಟಕಂದ || ೨ ||
ದೇಗುಲವನೊಡೆದಿರುವ ಧರ್ಮಭಕ್ಷಕರಿವರು
ಮಾಗಿದಾಡಳಿತಗಾರರೆನಿಸಿ ಕೊಂಡವರು |
ಯೋಗದಲಿಯಾಡಳಿತ ಚುಕ್ಕಾಣಿ ಹಿಡಿದವರು
ಬೀಗಿದರೆ ಒಡೆಯುವರು - ಪುಟ್ಟಕಂದ || ೩ ||
ಎಲ್ಲಿಗೂ ಸಲ್ಲದವರಂತಿರುವ ಗಡಿಜನರ
ಬಲ್ಲಿದರೆ ರಕ್ಷಿಸಿರಿ ಮಾನಧನರಾಗಿ |
ಸಲ್ಲಲಿತ ಸಂತಸದಿ ಸಲ್ಲಾಪವೆಸಗಿದರೆ
ಫುಲ್ಲಲೋಚನನೊಲಿವ - ಪುಟ್ಟಕಂದ || ೪ ||
ಕನ್ನಡದ ಗಡಿಕಾಯ್ವ ಗುಡಿಕಾಯ್ವ ಜನರೆಲ್ಲ
ಸನ್ನಡತೆ ಮೈವೆತ್ತು ಬನ್ನಿ ಬಲುಬೇಗ |
ಮುನ್ನಡೆಸ ಬೇಕಿಂದು ನಾಡುನುಡಿ ರಥವನ್ನು
ಬನ್ನವೆಲ್ಲವ ಮರೆತು - ಪುಟ್ಟಕಂದ || ೫ ||
ವಿ.ಬಿ.ಕುಳಮರ್ವ , ಕುಂಬ್ಳೆ
ಸಂಗೀತ ಸಂಯೋಜಿಸಿ ಹಾಡಿದವರು: ಕಲಾಶ್ರೀ ವಿದ್ಯಾಶಂಕರ್ ಮಂಡ್ಯ
ಕಾಮೆಂಟ್‌ ಪೋಸ್ಟ್‌ ಮಾಡಿ