ಸಾಧಕರನನುಕರಿಸವರ ಚಿಂತನೆಯ ತಿಳಿದು
ಬೋಧಕರ ಗೌರವಿಸು ಪಾಂಡಿತ್ಯವರಿತು |
ಭೇದತೋರುವ ಜನರ ದೂರವಿರಿಸಲು ಬೇಕು
ವೇದವೋದುತ ನೀನು - ಪುಟ್ಟಕಂದ || ೧ ||
ನಾವು ಬದುಕಲು ಬೇಕು ಇತರರನು ಬದುಕಿಸುತ
ಭಾವನೆಯ ಸಾಗರದ ವಾತ್ಸಲ್ಯ ತೋರಿ |
ನೋವ ಮರೆಸಲು ಬೇಕು ಕಷ್ಟದಲಿ ಭುಜಕೊಟ್ಟು
ಓವಿ ಸಲಹುತಲವರ - ಪುಟ್ಟಕಂದ || ೨ ||
ಅಳುನುಂಗಿ ನಗಬೇಕು ಅನಿವಾರ್ಯವೆಂದೆನಿಸೆ
ತಳತನಕ ಶೋಧಿಸುತ ನಿಜವ ತಿಳಿಯಲಿಕೆ |
ಒಳಮನದಿ ಚಿಂತಿಸುತ ಸತ್ಯವನು ಹುಡುಕಿದರೆ
ಗೆಳೆತನವು ವೃದ್ಧಿಸುಗು - ಪುಟ್ಟಕಂದ || ೩ ||
ಕಲೆಗಿರದು ಜಾತಿಮತ ಭಾಷೆಗಳ ತಡೆಬೇಲಿ
ಬಲೆಯನೇ ಹರಿದೊಗೆವ ಸಾಮರ್ಥ್ಯವದಕೆ |
ನೆಲಜಲವನೊಂದೆಡೆಗೆ ತರುವ ಕಸುವದಕಿರಲು
ನೆಲೆಯನೆಂತರಿಯುವೆಯೊ - ಪುಟ್ಟಕಂದ || ೪ ||
ಮಾನಸಿಕ ದೈಹಿಕದ ಜೀವಗಳು ಜತೆಯಿರಲು
ಮಾನವನ ಬದುಕಿನಲಿ ಸಾರ್ಥಕ್ಯವಿಹುದು |
ಸಾನುರಾಗದಿ ಬಾಳಹಾದಿಯಲಿ ಸಾಗಿದರೆ
ಧೇನುಸಖ ಹರಸುವನು - ಪುಟ್ಟಕಂದ || ೫ ||
ಮನುಜರಿಗೆ ಬಲುಸುಲಭ ಸಂಬಂಧ ಕಳಚಲಿಕೆ
ದನುಜತನವನು ತೋರಿ ವೈರ ಬೆಳೆಸಲಿಕೆ |
ಮನದೊಳಗೆ ಕುತ್ಸಿತವ ತೋರಿ ಹೋರಾಡಿದರೆ
ಶುನಕದಿಂ ಕಡೆಯಕ್ಕು - ಪುಟ್ಟಕಂದ || ೬ ||
ಕಷ್ಟಗಳ ಮೆಟ್ಟದವ ಸುಪ್ಪತ್ತಿಗೇರುವನೆ
ಇಷ್ಟಾರ್ಥ ಸಾಧಿಸಲು ಯೋಗ್ಯನೆನಿಸುವನೆ |
ನಷ್ಟಗಳ ಸಾಲಿನಲಿ ಮೃಷ್ಟಾನ್ನ ಉಣ್ಣುವನೆ
ನಿಷ್ಠೆಯನು ಮರೆತಿರಲು - ಪುಟ್ಟಕಂದ || ೭ ||
ಧರ್ಮವನು ಮೀರಿ ಧನಗಳಿಸೆ ನೆಮ್ಮದಿಯಿರದು
ಕರ್ಮಸಾಧನೆಯ ಮಾರ್ಗದೊಳು ಸುಖವಿರದು |
ನಿರ್ಮಲದ ಹೃನ್ಮನದಿ ಕಾಯಕವನೆಸಗಿದರೆ
ಕರ್ಮಡುವ ಜಲಸೊದೆಯು - ಪುಟ್ಟಕಂದ || ೮ ||
ಭಾವಶುದ್ಧದಲಿ ಮನದನುಭಾವ ಹೊರಸೂಸೆ
ಯಾವಮಾತಿಗು ಸಮವಿರದ ಮಮತೆಯಿಹುದು |
ಬೋವ ಭಾವರ ಮಾತು ಸಂಬಂಧ ಮೀರಿದುದು
ಸಾವಕಾಶದಿ ನೋಡು - ಪುಟ್ಟಕಂದ || ೯ ||
ಭವಿತವ್ಯವನು ಊಹಿಸಲಸದಳವೆಂದೆನಿಸೆ
ಬುವಿಯೊಳಗೆ ಭವಿತವ್ಯ ಸೃಷ್ಟಿಸಲು ಸಾಧ್ಯ |
ಸವಿಸೊಗದ ಬಾಳು ಮನುಜನಿಗೊಲಿದು ಬರುವುದೆನೆ
ಭವಿಗಳಿಗೆ ಸಂತಸವು - ಪುಟ್ಟಕಂದ || ೧೦ ||
( ಗಜ , ಗಜ , ಸಿಂಹ , ಸಿಂಹ , ಗಜ , ಸಿಂಹ , ಶರಭ , ಶರಭ , ಗಜ , ಸಿಂಹಪ್ರಾಸಂಗಳಿಂದ ಕೂಡಿದ ಛಂದೋಬದ್ಧ ಆಶು ದಶಮುಕ್ತಕಗಳು)
ರಚನೆ: ವಿ.ಬಿ.ಕುಳಮರ್ವ, ಕುಂಬ್ಳೆ.
ಗಾಯನ: ಬಾಲಕೃಷ್ಣ ಆಚಾರ್ಯ ಪುತ್ತಿಗೆ
(ಉಪಯುಕ್ತ ನ್ಯೂಸ್)
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
إرسال تعليق