ಆಲಿಸಿ: ಕವನ- ತಾಳ್ಮೆ

ಕವನ: ತಾಳ್ಮೆ  

ರಚನೆ:  ಡಾ.ಕಲಾಧರ, ಮಂಡ್ಯ..

ರಾಗ-ಸಂಗೀತ- ಗಾಯನ: ಕಲಾಶ್ರೀ ವಿದ್ಯಾಶಂಕರ್, ಮಂಡ್ಯ.

ತಾಳ್ಮೆ

ಮನದ ಕೊಳದೊಳಗೆ ಭಾವಗಳು ಕದಡಿರಲು

ತಿಳಿಗೊಳದ ತಳವ ಇಣುಕಿ ನೋಡು/

ಬಗ್ಗಡವು ಘನವಾಗಿ ತಳವ ಸೇರುವ ಹಾಗೆ 

ಮನವು ತಿಳಿಯಾಗುವುದು ಕಾದು ನೋಡು//

ಮನದೊಳಗೆ ಆವರಿಸೆ ಶೂನ್ಯ ಭಾವದ ನಿಶೆಯು

ರಾತ್ರಿಯಾ ನಭದತ್ತ ಒಮ್ಮೆನೋಡು/

ಚಂದ್ರಮನ ಹುಡುಕುತ್ತ ತಾರೆ ಮಿನುಗುವ ಹಾಗೆ

ಮನದ ಮೂಲೆಯ ಬೆಳಕ ಹುಡುಕಿ ನೋಡು//

ಕಹಿ ನೆನಪುಗಳ ನೆನಪು ಮನದಿ ವಿಪ್ಲವ ಮಾಡೆ, 

ಹೂದೋಟದಲ್ಲೊಮ್ಮೆ ಕುಳಿತು ನೋಡು/

ಮುಳ್ಳ ಗಿಡದಲಿ ಬಿರಿವ ಚೆಂಗುಲಾಬಿಯ ಹಾಗೆ

ಸವಿ ನೆನಪುಗಳ ಅರಸಿ ಸವಿದು ನೋಡು //

        -  ಕಲಾಧರ