ಇಂದು ರಥಸಪ್ತಮಿಯು ಏಳಿರಿ
ಎಂದು ಎಚ್ಚರಿಸಿರಲು ಹಿರಿಯರು
ಬಂದರೆಲ್ಲರು ಕಣ್ಣನುಜ್ಜುತ ಹಾಸಿಗೆಯ ತೊರೆದು l
ವಂದಿಸುತ ದೇವರಿಗೆ ಮುದದಿಂ
ಮುಂದೆ ಮಾಡುವ ಕಾರ್ಯವರಿಯುತ
ಚೆಂದದಿಂದಲಿ ಮಗ್ನರಾದರು ತಮ್ಮ ಕೆಲಸದೊಳು ll
ಸಾರಿಸಲು ಗೋಮಯದಿ ಅಂಗಳ
ನಾರಿಯರು ಮೆಲುವಾಗಿ ಹಾಡುತ
ಪೋರಿಯರು ಅಣಿ ಮಾಡುವರು ಕೆಮ್ಮಣ್ಣು ರಂಗೋಲಿ l
ಮೂರು ಬದಿಯಲಿ ಪದ್ಧತಿಯ ಅನು
ಸಾರವಾಗಿಯೆ ಅಂಚು ಚಿತ್ರಿಸಿ
ಭಾರಿ ತೇರಿಗೆ ಜಾಗ ಬಿಡುವರು ನಟ್ಟ ನಡುವಲ್ಲಿ ll
ಅಕ್ಕಿ ಹಿಟ್ಟಿಗೆ ಬಣ್ಣ ಬೆರೆಸುತ
ಚುಕ್ಕೆಗಳ ಲೆಕ್ಕಿಸುತಲಿಕ್ಕುತ
ಚೊಕ್ಕವಾಗಿಯೆ ರಥದ ಚಿತ್ರವ ಬಿಡಿಸುವರು ಅವರು l
ಅಕ್ಕ ಪಕ್ಕದ ಜನರು ನೋಡುತ
ಬೆಕ್ಕಸಂ ಬೆರಗಾಗಿ ಪೊಗಳಲು
ಚಿಕ್ಕ ಮಕ್ಕಳ ಹಾಗೆ ಜಂಬದ ನಗೆಯ ಬೀರುವರು ll
ಎಕ್ಕೆದೆಲೆಗಳನಿಟ್ಟು ಮೀಯತ
ತೆಕ್ಕನೆಯೆ ಮಡಿವಸ್ತ್ರ ಧರಿಸಲು
ಜಕ್ಕುಳಿಸುವುದು ಅಯ್ದೆಯರಿಸಿನ ಮೊಗದಲಿಹ ಸೊಬಗು l
ಶರ್ಕರಾನ್ನವ ಮಾಡಿ ದೇಗುಲ
ಹೊಕ್ಕರಣಿ ಬಳಿ ಎಡೆಯನಿಡುತಿರೆ
ಪೆರ್ಕಳಿಸುವುದು ಹಣೆಯಲಿಟ್ಟಿಹ ಕುಂಕುಮದ ಬೆಡಗು ll
ನಲಿವ ಜಗ ವೀಕ್ಷಿಸಲು ಮೂಡಣ
ಲಲನೆ ಬಾನಂಚಿನಲಿ ಇಣುಕಲು
ಬೆಳಕು ಹರಿಯುವ ಮೊದಲೆ ಕಂಡಳು ಪುರಜನರ ಹುರುಪು l
ಚೆಲುವೆಯರ ತೇಜಸ್ಸು ವರ್ಧಿಪ
ಬಿಳಿಯ ಹಣೆ ನಡುವಲ್ಲಿ ಕಂಡಳು
ಹೊಳೆವ ಸೂರ್ಯನ ತೆರದಿ ಕಾಣುವ ಕುಂಕುಮದ ಸೊಂಪು ll
ನೋಡುತಲೆ ಮುತ್ತೈದೆ ಹಣೆಯಲಿ
ತೀಡಿ ತಿದ್ದಿದ ಕೆಂಪು ಕುಂಕುಮ
ಮೂಡ ಹೆಣ್ಣಿಗೆ ಲಜ್ಜೆಯಾಗಲು ಬರಿಯ ಹಣೆ ನೆನೆದು l
ಗಾಢಗೆಂಪಿನ ಬಾಲ ರವಿಯನೆ
ಸೂಡಿಕೊಂಡಿರುವಂತೆ ಕಂಡಿದೆ
ನಾಡು ನಲಿದಿದೆ ಇಂದು ರಥಸಪ್ತಮಿಯ ತೇರೆಂದು ll
ರಚನೆ: ವಸುಮತಿ ರಾಮಚಂದ್ರ. ಬೆಂಗಳೂರು
ರಾಗ. ಸಂಗೀತ. ಗಾಯನ. ಕಲಾಶ್ರೀ ವಿದ್ಯಾಶಂಕರ್ ಮಂಡ್ಯ
ಉಪಯುಕ್ತ ನ್ಯೂಸ್ ಕುಟುಂಬ ಸೇರಲು ಇಲ್ಲಿ ಕ್ಲಿಕ್ಕಿಸಿ
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
إرسال تعليق