ಮರವಿರದೆ ಮಾನವನ ಜೀವನಕೆ ಬೆಲೆಯಿರದು
ಗುರುವಿನುಪದೇಶ ಕೇಳದಿರೆ ನೆಲೆಯಿರದು |
ತರುಕುಲವ ತರಿಯದೆಯೆ ಸೊಂಪಾಗಿ ಬೆಳೆಸಿದರೆ
ವರವಹುದು ಆರೋಗ್ಯ - ಪುಟ್ಟಕಂದ ||
|| ೧ ||
ವನದೊಳಗೆ ಬೆಳೆಯುತಿರೆ ಘನವೆತ್ತ ಸಂಪದವು
ಮನವರಳಿ ಸುಮದಂತೆ ಕಂಪು ಸೂಸುವುದು |
ತನುಮನಕೆ ಆರೋಗ್ಯಭಾಗ್ಯಗಳ ತವನಿಧಿಯು
ಅನುವಶದ ವರವಕ್ಕು - ಪುಟ್ಟಕಂದ ||
|| ೨ ||
ವೃಕ್ಷದಲಿ ಗೆಲ್ಲುಗಳು ಮತ್ತೆ ಹಸುರೆಲೆ ಚಂದ
ಪಕ್ಷಿಗೂಡೊಳು ಪುಟ್ಟ ಸಂಸಾರ ಬಂಧ |
ಅಕ್ಷಿಯಲಿ ಚೆಲುನೋಟ ಮನುಜನಿಗೆ ಸಹಜತೆಯು
ಲಕ್ಷ ಗಿಡಗಳ ಸಲಹೊ - ಪುಟ್ಟಕಂದ ||
|| ೩ ||
ಗಿಡನೆಟ್ಟು ಬೆಳೆಸಿದರೆ ಹೂವಾಗಿ ಫಲದೊರೆತು
ಮೃಡ ನಿನ್ನ ಹರಸುವನು ಸುಖವ ನೀಡುವನು |
ಜಡತೊರೆದು ಮುದದಿಂದ ಕಾಯಕವನೆಸಗಿದರೆ
ಕಡೆತನಕ ಗೆಲವಿಹುದು - ಪುಟ್ಟಕಂದ ||
|| ೪ ||
ಮರಬೇಕು ತೊಟ್ಟಿಲಿಗೆ ಹರಿಯೊಲಿದ ಕಂದನಿಗೆ
ಮರವೆ ಭಗವಂತ ನಿತ್ತಿಹ ವರವು ನಮಗೆ |
ಮರಗಿಡವ ಪೋಷಿಸಲು ಆರೋಗ್ಯ ಮನುಜರಿಗೆ
ಮರವೆ ದೇವರ ವರವು - ಪುಟ್ಟಕಂದ ||
|| ೫ ||
(ಇಂದಿನ ದಿನವಿಶೇಷದ ಆಶು ಮುಕ್ತಕ ಪಂಚಕ)
- ವಿ.ಬಿ.ಕುಳಮರ್ವ , ಕುಂಬ್ಳೆ
ರಾಗಸಂಯೋಜನೆ ಮಾಡಿ ಹಾಡಿದವರು ಹಿರಿಯ ಗಮಕಿ ಕಲಾಶ್ರೀ ವಿದ್ಯಾಶಂಕರ ಮಂಡ್ಯ
Visit: Upayuktha Directory- You get here You want
(ಉಪಯುಕ್ತ ನ್ಯೂಸ್)
‘ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್‌ ಗ್ರೂಪಿಗೆ ಸೇರಲು ಈ ಲಿಂಕ್ ಕ್ಲಿಕ್ ಮಾಡಿ
ಕಾಮೆಂಟ್‌ ಪೋಸ್ಟ್‌ ಮಾಡಿ