ಜಾನಪದ ಶೈಲಿಯ ಛಂದೋಬದ್ಧ ತ್ರಿಪದಿ
ಪರಮೇಶ ಗೌರೀಶ ಪರಶಿವ ಶಂಕರ
ಹರಹರ ಶಂಭೋ ಮಹದೇವ | ಸರ್ವೇಶ|
ಗಿರಿಧರ ನೀನೇ ಕಾಪಾಡು||೧||
ಶಿವಶಿವ ಎನ್ನುತ ಶಿವನಾಮ ಜಪಿಸಲು
ಭವರೋಗ ದೂರ ಸರಿದಾಗ| ಮನಸಿಗೆ|
ತವನಿಧಿ ದೊರೆತ ಸಂತಸ||
ತೆಂಗಿನ ಎಳನೀರು ಲಿಂಗಕ್ಕೆ ಅಭಿಷೇಕ
ಮಂಗಳ ವಾದ್ಯ ಘೋಷವು| ಮೊಳಗಲು|
ಕಂಗಳ ಕಾಂತಿ ಬೆಳಗೀತು ||
ಕವಿದಿಹ ಕತ್ತಲೆ ಭವಿತವ್ಯ ಬೆಳಗಲು
ಶಿವರಾತ್ರಿ ದಿನದ ಉಪವಾಸ| ಭಜನೆಯು|
ಜವರಾಯನನ್ನೂ ಗೆಲುತಾವ||
ಶಂಕರ ಶಶಿಧರ ಕಿಂಕರ ನಾನಾಗಿ
ಕುಂಕುಮ ಭಾಗ್ಯ ಉಳಿಸೆಂದು| ಶರಣಾಗಿ|
ಸಂಕಟ ಹರನ ಬೇಡುತ||
ಕಷ್ಟವನೊಡ್ಡುತ ಇಷ್ಟವನರಿಯುತ
ಮುಷ್ಟಿಯ ಸುಖವ ನೀಡುತ| ಪರಶಿವ|
ಇಷ್ಟಾರ್ಥವನ್ನು ಕರುಣಿಸಿ ||
ರುದ್ರಂಗೆ ಅಭಿಷೇಕ ನಿದ್ರೆಯ ಮಾಡದೆ
ಭದ್ರತೆಯನ್ನು ಬೇಡುತ| ಬಾಳಲ್ಲಿ|
ರುದ್ರಾಕ್ಷಿ ಮಾಲೆ ಧರಿಸುತ್ತ||
ನೊಸಲಿಗೆ ಭಸ್ಮವ ಹಸನಾಗಿ ಲೇಪಿಸಿ
ಮಸಣದ ಬಳಿಯೆ ನಿಂತಿದ್ದ |ಬೈರಾಗಿ|
ಕುಸಿದಿದ್ದ ಜನರ ಹರಸುತ್ತ||
ಶಿವರಾತ್ರಿ ದಿನವೆಲ್ಲ ಸುವಿಚಾರ ಚಿಂತನೆ
ಧವಳದ ಕೀರ್ತಿ ಪಸರಿಸಿ| ಜಗದಲ್ಲಿ|
ಭುವನದಿ ಶಾಂತಿ ತಲೆದೋರಿ||
ರಚನೆ: ಲಕ್ಷ್ಮೀ ವಿ ಭಟ್, ಮಂಜೇಶ್ವರ
ರಾಗ ಸಂಯೋಜನೆ:- ಪ್ರಸನ್ನಾ ಸಿ ಎಸ್ ಭಟ್ ಕಾಕುಂಜೆ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
إرسال تعليق